E puer Theaterstécker – aus dem Laf vun de Joren ...

 

... sief et fräi adaptéiert no engem auslänneschen Original,

sief et op Iddi a Motiven aus engem Roman opgebaut

oder sief et als eegent Stéck ...

 

 

 

PALTONG, BOX AN HIEM

 

e Koméidi-Stéck an 3 Akten

 

Persounen: 4m/4w oder 3m/5w (+ e puer Statisten)

Décor: 1. an 2. Akt: einfach Stuff / 3. Akt: um Geriicht

 

Déi ganz Strooss ass entsat, wéi de Putty Eilebecker, e klenge Gemengenemployé, mueres am Pyjama mat Hutt a Sonnebrëll vun der Gare heemkënnt. Wat ass do am Zuch geschitt? Wou ass säin deiere Kostüm bliwwen? A virun allem: wéi kënnt den Eilebecker un dee sëlleche Frick, mat deem en elo op eemol e Liewe féiert, dat e sech jo guer net leeschte kann? Mä d’Noperschaft kritt näischt eraus, bis op engem turbulente Geriichtsprozess d’Kaz aus dem Sak gelooss gëtt – eng drolech Affär, déi ebe keng Affär duerf sinn a ginn ...

(1985)

 

*

 

 

KUDDEL-MUDDEL

 

e Koméidi-Stéck an 3 Akten

 

Persounen: 4m/4w oder 5m/3w (+ éventuell e puer Statisten)

Décor: an der Entrée-Hall vun engem klengen Hotel

 

Eng ganz Rei urkomesch Personnagë suerge fir Opreegung a Chaos am Hotel „Vieux Luxembourg“ - si selwer, ower och dräi méi oder wéineger "suspekt" Kofferen, déi hin an hier verwiesselt ginn.

(1988)

 

*

 

 

FAMILLJEGEHEIMNIS

 

e Boulevard-Stéck an 2 Deeler

 

Persounen: 4m/2w

Décor: moderne Salon

 

Dem Pierrot säi Filston, de Bob, soll deemnächst mat deem Tanja bestuet ginn, mä d’Tanja huet e Problem: hatt ass net verléift an de Jong, mä an de Papp! An esou gëtt dem Tanja säi Problem dann och dem Pierrot säi Problem, well dee weess nu wierklech net méi an nach aus. E verfänkt sech ëmmer an neie Ligen, muss ëmmer méi improviséieren a fënnt sech schlussendlech an enger verzweifelter Situatioun erëm, déi et nu wierklech a sech huet.

(2009)

 

*

 

 

GECKEGE FRICK

 

eng Comédie an 2 Deeler (oder 3 Akten)

 

Persounen: 3m/2w oder 3m/3w oder 4m/2w oder 4m/3w (resp. 5m/2w)

Décor: klengbiergerlech Stuff

 

An der klenger, onschëlleger Welt vum Charel Brimeyer (ale Jonggesell an naiven Optimist) ass de Mueren der Däiwel lass: d’Bank vu vis-à-vis gouf haut iwwerfall, a währenddeem de Commissaire en chef Dupaillon dat ganzt Haus vun uewe bis ënnen op d’Kopp setzt, hunn de Jerry a seng Komplizin, d’Lulu, sech mat deenen 300.000 Euro ausgerechent hei bei him an der Wunneng verstoppt. A setzt de Jerry och méi op brutal Stratégien, da versicht d’Lulu mat all sengem Charme de Brimeyer ze wéckelen. Esou stellt sech no no d’Fro: Milliounefrick schéin a gutt, mä gëtt et net nach eppes méi am Liewen? D’Geld huet zwar seng eegen Erotik, mä ass et wierklech de Schluss vun allem?

(2010)

 

 *

 

 

VOLL DERNIEFT

 

eng Farce an 1 Deel (mat zwou kuerze Black-Pausen)

 

Persounen: 3m/2w

Décor: modernen Appartement-Salon

 

Et kënnt knëppeldéck fir de Jim Ackermann: Ass dat, wat hien haut alles erlieft, déi reell Realitéit oder nëmme schlecht gedreemt? A ween ass dann elo hei wierklech nieft der Plack: hien, säi Laurence oder all déi ronderëmmer? Wéi d’Sandy Moulin, déi mystériéis Botzfra, déi iwwerall matmëscht … de Lex Colling, en Noper vum Stack, deen nach eng Femme Fatale fir a säin neie Roman sicht … oder éieren de Jacquot Peiffer, en hondsfrieme Käerel, dee sech net nëmme mat Sak a Pak bei hinnen aquartéiert, mä och nach all klengsten Détail aus dem Laurence sengem Liewe kennt? Hei leeft iergendwéi eng grotesk a geféierlech Intrig, well jiddweree spillt e falscht Spill ...

(2011)

 

 *

 

 

DEE LESCHTEN NO FEIEROWEND

 

eng Comédie an 2 Deeler (4 Akten)

 

Persounen: 5m/4w

Décor: Wunnsalon

 

Skandal am Duerf: wéi d’Madame Pompadour, eng besser Madame, déi fir e puer Deeg hei am Hotel logéiert, gëschter Owend nach e wéineg duerch de Park spazéiert ass, stong op eemol e Maansmënsch hannert dem Gestraiss, huet de Mantel opgerappt - an drënner puddelplakeg. Si hätt just säi „Petit-Quelque-Chose“ gesinn, mä de Rescht vum Mënsch net.

En Exhibitionist! A grad elo, wou d’Gemeng esou vill fir den Tourismus investéiert!

D’Enquêtë lafe bei den Autoritéiten (dem Buergermeeschter, dem Gemengesekretär an dem Duerfpolizist) op Volltueren, ower se fannen nëmme just eppes eraus: et muss dee gewiescht sinn, deen als leschten aus dem Bisrot heem gaangen ass.

Mä wee wor dee leschten? Dat ass schwéier soen: jidderee wor scho fort oder ka sech un näischt méi erënneren. Deemno schéngt et bal onméiglech fir dee Schëllegen ze fannen, well een dee sech selwer noleeft, kritt sech ni erëm ...

(2015)

 

 (fir en Duerchlies-Exemplaire mat allen Détailer

oder fir weider Renseignementer)