Ech sinn ee frëndlech-där-al-Bomen-iwwert-d’Strooss-goe-Loossert,

Een ouni-Knaddre-siwe-Boxe-bei-dem-„Bram“-Umoossert,

Ech sinn ee bei-all-Goal-fir-d’Preisen-esouuuu-Bulle-Kréiert,

Ee bei-der-Tombola-am-Koup-déi-richteg-Lousen-Zéiert,

Ech sinn ee bei-de-Witzen-d’Pointe-bal-ëmmer-richteg-Zielert,

Een ni-aus-Pietéit-an-d’Doudesannoncen-Grompre-Schielert,

Ech sinn ee mat-der-Fra-zweemol-am-Mount-duerch-Tréier-Shoppert,

Een an-der-Sauna-schnell-de-Pumuckel-am-Duch-Verstoppert.

 

Do seet der dach schonn däi Verstand

An och d’Gefill am Bauch:

Esou Leit sinn et, déi e Land

An dësen Zäite brauch.

Kapazitéiten just, ajo,

Als staark Forces Vives,

Als staark Forces Vives,

Als staark Forces Vives de la Nation!

 

Ech sinn ee mueres-scho-virun-aacht-Auer-Bläistëftspëtzert,

An ee bei-déiwem-Décoll’té-direkten-Aan-Zoupëtzert,

Ech sinn ee bei-dem-Kéis-meng-Nummer-mat-Gefill-Ofrappert,

Ee fromm-beim-Wäiwaasser-net-ëmmer-déi-ganz-Hand-dran-Zappert,

Ech sinn e Gaardenzwerg-no-all-Vulleschass-nees-blénkeg-Reiwert,

Een « Avec-ma-plus-haute-considération-et-l’expression-de-mes-sentiments-les-plus-distingués »-ënnen-op-all-Bréiwer-Schreiwert,

Ech sinn ee bei-all-Prëssessioun-schéin-an-der-Rei-Matgoert,

Ee bei-dem-Chef-laang-virum-Néitsche-scho-Gesondheet-Soert.

 

Do seet der dach schonn däi Verstand

An och d’Gefill am Bauch:

Esou Leit sinn et, déi e Land

An dësen Zäite brauch.

Kapazitéiten just, ajo,

Als staark Forces Vives,

Als staark Forces Vives,

Als staark Forces Vives de la Nation!

 

Ech sinn ee bei-de-Flicken-ni-„So-Knëff-du-kanns-mech“-Denkert,

Ee Chrëschtdagsbulle-schéi-symetresch-op-de-Beemchen-Hänkert,

Ech sinn e Strëmp-a-Kalzong-ganz-pedantesch-Fale-Streckert,

En Timber-d’éischt-diagonal-an-da-rondrëmmer-Leckert,

Voilà, ech sinn ee comme il faut, keen Tessler a kee Wouschtert,

Ee wéi-'t-sech-passt-am-Krankeschäin-de-ganzen-Dag-laang-Houschtert,

Ee sonndes-ni-déi-helleg-Hostercher-zerknat-Ofschléckert,

Mä an-der-ganzer-Noperschaft-dee-schnellste-Bounepléckert.

 

Do seet der dach schonn däi Verstand

An och d’Gefill am Bauch:

Esou Leit sinn et, déi e Land

An dësen Zäite brauch.

Kapazitéiten just, ajo,

Als staark Forces Vives,

Als staark Forces Vives,

Als staark Forces Vives de la Nation!